Berisha në Berat: Origjina e gjithçkaje që po pësojmë janë vjedhjet, Rama e takson mbi 1 euro litrin e naftës

Sot kemi 60 mijë familje në mjerim të cilat nuk kanë të garantuar kafshatën në 3 vaktet e bukës.

Ish-kryeministri, Sali Berisha, gjatë takimit elektoral në Berat për zgjedhjet për kreun e ri të PD-së tha se origjina e të gjitha gjërave të cilat po pësojmë janë vjedhjet.

Ai gjithashtu tha se në Shqipëri litri i naftës kushton më shumë se në SHBA dhe pse ka të ardhura dhjetra herë më të larta.

Sali Berisha: “Origjina e të gjitha këtyre që pësojmë ne janë vjedhjet. Si ka mundësi në Shqipëri  nafta 2.2 dollar. Në SHBA me të ardhura dhjetra herë më të larta se Shqipëria, po lexoja dje, nafta ishte 1.05 dollar litri. Sigurisht, sepse Edi Rama e takson mbi 1 euro litrin e naftës. Si ka mundësi që vaji të rritet 3 herë, si ka mundësi që buka t’iu kushtojë 85 herë më shumë se në BE shqiptarëve? Rriten çmimet qeveria ka një detyrë, rriten rrogat në proporcion. Të paktën nuk bëhesh më i varfër.”

“Këtu vendosen borde, vendosen për të përligjiur vjedhjen e qytetarëve. I kam paralajmëruar, hiqni dorë, largohuni nga bordet se po e bëni me korrupsion për bizneset tuaja”, tha Berisha.

Ish kryeministri tha gjithashtu se gjatë këtyre viteve varfëria ekstreme është rritur 4 herë

Sali Berisha: “Në vitin 2013 kishte 15 mijë familje në gjendje mjerimi (kur të ardhurat janë nën 1.25 dollar). Ne bëmë rregjistrimin dhe bëmë që ato të merrnin të ardhura mbi këtë nivel. Gjatë këtyre viteve varfëria ekstreme është rritur 4 herë dhe sot kemi 60 mijë familje në mjerim të cilat nuk kanë të garantuar kafshatën në 3 vaktet e bukës.”