Ermal Meta, një nga kantautorët më të pëlqyer, pas shumë këngëve të shkruara, kënduara dhe dhuruara për artistë të tjerë, debuton edhe si shkrimtar artistik.

Së fundmi, ai boton librin e tij të parë, një roman me afro 600 faqe të titulluar ‘Domani e per semper’ (Nesër dhe përgjithmonë).

Romani tregon historinë prekëse të Kajanit, një djali i lindur në Shqipëri gjatë Luftës së Dytë Botërore, i cili ka një talent të madh për pianon. Rreth tij rrotullohen një sërë personazhesh të paharrueshëm të shekullit të njëzetë. Një udhëtim që është shumë i ngjashëm në mënyrë dramatike me atë që po ndodh sot.

Jemi në vitin 1943, Kajan jeton në një fermë me familjen e tij dhe gjyshin Betim në fshatin shqiptar. Prindërit e tij janë partizanë dhe janë në male duke luftuar kundër nazistëve. Ekzistenca e Kajanit rrjedh disi larg mizorive të luftës, derisa një ditë një dezertor gjerman i quajtur Cornelius troket në derën e tyre, duke kërkuar strehim…

Libri do të publikohet nga shtëpia botuese ‘La Nave di Teseo’ më 19 maj.