Glauk Olldashi, djali i Sokoll Olldashit, ka bërë një thirrje të fortë gjatë fjalimit të tij në Kuvendin e Partisë Demokratike.

Olldashi tha se zjarrin brenda demokratëve e ka ndezur rinia, ndërsa theksoi se, si e tillë duhet të jetë në fokus të organeve të PD.

“Rinia është ajo që e ndezi këtë zjarr që sot kemi të gjithë brenda nesh dhe po rinia do ta mbajë ndezur për vite me radhë. Rinia është zemra e PD dhe si e tillë duhet të jetë në fokus të organeve të PD. Në Forumin Rinor janë intelektualët, artistët, kontribuesit e përhershëm të PD.

Fokusi i PD duhet të jetë përtej rrëzimit të PS. Ne duhet të diferencojmë veten dhe të tregojmë vlerat tona parësore në shoqëri.

Nuk mjafton të mblidhemi njëherë në dy vjet, nuk mjafton të ngrejmë akuza ndaj kundërshtarit. Duhet të tregojmë se kush është e djathta, duhet të jemi një shembull. Rruga që kemi nisur na tregoi edhe njëherë se çfarë është gara. Kemi mundësi për ta bërë PD edhe më të mirë se çka qenë. Gjithçka është në dorën tonë”, theksoi ai ndër të tjera.