Kolegji i Posaçëm i Apelimit ka riçelur hetimin gjyqësor për drejtuesen e Prokurorisë së Tiranës, Elisabeta Imeraj. Seanca ka nisur sot ku pritet të rishqyrtohen provat e paraqitura nga të dyja palët.

KPA ka refuzuar kërkesën për thirrjen e dëshmitarëve, anëtarëve të KLP-së dhe vëzhguesit të ONM Theo Jacobs. KPA shton se riçelja e hetimit gjyqësor është vendosur pas paraqitjes së fakteve dhe provave, nga Komisioneri Publik dhe vetë Imeraj.

Në Kolegjin e Posaçëm të Apelimit ka nisur seanca ndaj drejtueses së Prokurorisë së Tiranës, Elisabeta Imeraj, dhe është marrë vendimi për riçelje të hetimit gjyqësor si dhe janë pranuar provat shtesa që ajo ka kërkuar ndërkohë që ende nuk ka një njoftim nëse do të kemi vendim për shkarkimin ose konfirmimin në detyrë të saj.

“Pasi dëgjuam parashtrimit e komisionerit publik e atë te subjektit te rivlerësimit, vendosi te riçelë hetimin e te merren provat e depozituara nga Imeraj. Riçelet hetimi gjyqësor. Është rrëzuar kërkesa për thirrjen e dëshmitarëve. Si dhe refuzohet kërkesa për të thirrur si dëshmitar anëtaret e KLPK të shkallës se pare vetting si dhe Theo Jacobs”, ka thënë drejtuesja e trupës gjyqësore, Ina Rama.