Sjellja e ambasadores amerikane duke njohur Enkelejd Alibeajn si kryetar të PD-së përkundër vendimit të gjykatës, prodhoi një reagim tejet të ashpër të Partisë Demokratike.

Partia më e madhe opozitare, e drejtuar sipas vendimit të gjykatës nga Komisioni i Rithemelimit, bëri një akuzë të fortë ndaj Yuri Kim.

“Yuri Kim vërtetoi sot atë që e ka parathënë edhe me veprime të tjera se është në shërbim të lojrave të Edi Ramës për të dobësuar dhe për të mbajtur sa më gjatë peng opozitën, duke komanduar për kryetar ata që u refuzuan me votë masive nga demokratët.” – thuhet në reagim.

Një betejë e tillë tashmë frontale mes diplomates më të rëndësishme në vend dhe partisë më të madhe opozitare është fryt i angazhimit agresiv të Yuri Kim në politikën e brendshme të vendit. Që nga shprehja “mos hani bar” deri tek thirrja për të shmangur votimin e kandidatëve të propozuar nga personat non-grata në zgjedhje, pra kandidatëve të Berishës më 6 mars.

Pas muajsh artikulimesh më të kujdesshme nga krahu i Berishës ndaj Yuri Kim, pavarësisht kundërshtisë së hapur drejtuar asaj për mospërfilljen e ambasadores ndaj shumicës opozitare të “Shtëpisë së Lirisë” në zgjedhje dhe konfirmimit të gjykatës për Kuvendin e 11 dhjetorit, njohja e Alibeajt si kryetar të PD-së, ishte pika që derdhi gotën.

Partia Demokratike zyrtarisht e akuzon ambasadoren se po i shërben Edi Ramës.