Në vitin shkollor 2021-2022, u regjistruan në arsimin zyrtar 577.869 nxënës dhe studentë, duke pësuar një ulje prej 2%, krahasuar me vitin paraardhës.

Rënien më të lartë e ka regjistruar numri i nxënësve që janë regjistruar në arsimin e mesëm. Kujtojmë që numri i lindjeve në vend ka ardhur në rënie gjatë viteve të fundit, ndërsa ai i familjeve që largohen nga Shqipëria vijon të rritet.

Të dhënat e INSTAT tregojnë:

-Arsimi parauniversitar, 453.989 regjistrime, 2.5 % më pak nxënës

-Arsimi 9-vjeçar, 278.138 regjistrime, 2.9 % më pak nxënës

-Arsimi i mesëm, 103.467 regjistrime, 4.2 % më pak nxënës

-Arsimi i lartë, 123.880 regjistrime, 0.1 më shumë studentë

Shumica e nxënësve dhe studentëve frekuentojnë arsimin publik. Sa i përket degëve të preferuara më shumë nga studentët janë të fushave “Biznes, administrim dhe ligj”, ku është përqendruar një e katërta e numrit gjithsej të studentëve.

Ndërsa fusha më pak e preferuar është “Bujqësi, pyje, peshkim dhe veterinari” ku janë të regjistruar vetëm 2.2 % e numrit gjithsej të studentëve. 

Nga ana tjetër, fushat “Inxhinieri, prodhim dhe ndërtim” dhe “Shëndet dhe mirëqenie” paraqesin rritje të numrit të studentëve me përkatësisht 9.8 % dhe 4.4 %.