Një status i Suzana Skënderi Starikov, një përkthyese shqiptare në Gjermani, bëri bujë dje në mediat shqiptare, pasi shkruante se kryeministri Edi Rama do të emërohet Sekretar i ri i Përgjithshëm i NATO-s, në vend të, Jens Stoltenberg.

“Edi Rama do të pasojë Jens Stoltenberg në postin e Sekretarit të Përgjithshëm të NATO-s. Në veçanti thuhet se SHBA-të kanë insistuar në zgjedhjen e Sekretarit të Përgjithshëm të ardhshëm të NATO-s mes anëtarëve të rinj të NATO-s. Kandidatët ishin kryeministrja Katja Kalas dhe kryeministri Edi Rama. Kush do të jetë kryeministri i ardhshëm?”, shkruante Starikov.

Disa orë pas postimit, ajo sqaron se ishte një shaka për 1 prillin, ditën e gënjeshtrave.

“Thjesht po tallesha, ishte shaka për 1 Prillin, asgjë më shumë. Më vjen keq që ju zhgënjeva! Nuk kërkoj falje pasi është faji juaj që publikoni lajme pa verifikuar fakte pa marrë parasysh ditën e gënjeshtarëve sot” – shkruan ajo.

E pyetur nga Politiko.al se pse zgjodhi të ‘përdorë’ emrin e Edi Ramës për një shaka të tillë, ajo sqaron se dikur kishte thashetheme lidhur me këtë rast, por shton se kandidatura e tij i dukej joreale për t’u besuar.

“Thjesht sepse je e lirë të vendosësh çfarë të duash kur të bësh shaka ditën e 1 prillit, dhe ngaqë mendova se njerëzit do të binin pre. Dikur kishte thashetheme për këtë. Nga ana tjetër, kandidatura e tij më duket joreale, ndaj mendova se njerëzit do ta shijonin më shumë shakanë time”, shprehet Starikov për Politiko.