Debati publik është përqëndruar te afera e inceneratorëve, ku një ditë më parë SPAK kërkoi autorizim nga Kuvendi për arrestimin e deputetit Alqi Bllako. Ky i fundit ka bërë me dije se do të dorëzojë sot mandatin dhe se do të përballet me drejtësinë.

Partia Socialiste “e braktisi”, duke theksuar se nuk do të bëhet zyrë avokatie e askujt dhe se ka disa vija të kuqe. Socialistët janë në pushtet që prej vitit 2013 dhe rasti Bllako nuk është i parë.

Në këto nëntë vite, ka pasur edhe deputetë të tjerë socialistë që janë arrestuar. Rasti i parë ka ndodhur në mars të 2015-ës, ku në pranga ra ish-deputeti kristiandemokrat, pjesë e aleancës së Partisë Socialiste, Mark Frroku dhe deputeti Tom Doshi.

Prokuroria i akuzoi deputetët për deklarim të rremë në lidhje me dëshmitë e tyre për një skenar për vrasjen e Doshit. Disa muaj më pas u arrestua në flagrancë deputeti Armando Prenga.

Ky i fundit u përfshi në një konflikt më armë dhe ua rrestua vetëm disa orë pasi ndodhi ngjarja. Rasti më i bujshëm ishte ai i ish-ministrit të Brendshëm Saimir Tahirit.

Në 2017-ën, Prokuroria i kërkoi Kuvendit heqjen e imunitetit dhe autorizim për arrestim të ish-ministrit. Ai u akuzua për bashkëpunim me grupin “Habilaj” në trafikun ndërkombëtar të drogës.

Beteja e Tahirit me drejtësinë zgjati për disa vite. Më 4 shkurt të këtij viti ai u dënua me vendim të formës së prerë me 3 vite e 4 muaj burg. Ndërsa Lefter Koka, i cili u zgjodh deputet me siglën e PS-së në zgjedhjet e 25 prillit dha dorëheqjen vetëm disa ditë para mbledhjes së Kuvendit të ri në shtator dhe më pas u arrestua në muajin dhjetor.