Rexhep Qosja, siç e pranon vetë ka shkruar qindra faqe kundër Berishës dhe politikës së tij. Megjithëse nuk ka ndryshuar mendje, ai i është dorëzuar tundimit për të shkruar atë që quan panegjerik, dmth një lëvdatë për Doktorin.

Kjo me sa duket vjen pas rikthimit të paprecedent të ish-kryeministrit në politikën aktive, duke mundur Bashën në zgjedhjet e 6 marsit, dhe duke rimarrë Partinë Demokratike, edhe pas një vendimi gjykate.

Edhe pse vazhdon në linjën e vjetër të anatemimit, në një pjesë të një shkrimi të shkurtër për gazetën ultra të majtë DITA, akademiku Qosja i pranon Berishës energjinë dhe mendimet buçitëse e të sistemuara. Duke u shprehur se kur moshatarët e tij enden spitaleve, ai rikthehet në politikë.

Shkruan Qosja:  

“Megjithëse në moshën kur moshanikët e tij (Sali Berishës) enden korridoreve të spitaleve me fashikuj në duar plot diagnoza e dokumente të tjera mjekësore, ai po i bën këto beteja politike dhe që gati një vit po i tollovit shqiptarët në Shqipëri e Kosovë, unë, pas qindra e qindra faqeve të shkruara kundër politikës së tij, do të shkruaj tani një panegjirik për të: për energjitë e tij, për demagogjitë e tij artistike, për mendimet e tij të qarta, buçitëse, të sistemuara, të tejpërtej dëgjuara.”