Aktori i humorit Gaz Paja ka fituar statusin e investitorit strategjik për të ndërtuar një resort luksoz në Dhërmi, një bashkëpunim mes 2 kompanive me vlerë 13.8 milionë euro. 

“Dhërmi Resort” parashikon ndërtimin e një hoteli me 5 yje në një sipërfaqe prej 25 mijë metra katrorë.

Pjesa tjetër prej 108 mijë metrash do përdorët për të ndërtuar vilat të cilat do të shiten nga kompanitë dhe nuk sjellin asnjë zhvillim publik për turizmin.

Reagon Paja

Paja pretendon se në vendimin e Agjencisë Shqiptare të Zhvillimit të Investimeve, (AIDA) për ndërtimin e një resorti turistik në Dhërmi, nuk është përfituar tokë publike apo shtetërore.

Sipas vendimit, Paja cilësohet ‘investitor strategjik’ dhe kompania e tij ‘Ecotech Energy Services’ së bashku me kompaninë ‘Startek’ do të investojnë në Dhërmi 13.8 milionë euro në një hapësirë 133 mijë metra katrorë tokë.

Por, aktori i cilëson shpifje akuzat se në këtë sipërfaqe është përfshirë dhe një pjesë tokë publike, duke shtuar se toka është blerë nga pronarë të ligjshëm.

Për marrjen e statusit të ‘investitorit strategjik’, Paja thotë e kjo është një e drejtë që ia jep ligji në bazë të vlerës së investimit dhe se kusht për këtë është dakordësia e të gjithë pronarëve të tokës ku do të bëhet investimi.

Cilat janë lidhjet e aktorit me PS

Aktori Gazmend Paja i ka shprehur publikisht bindjet politike dhe mbështetjen për socialistët që prej vitit 2013.

Kulmi i angazhimit të tij me Partinë Socialiste ka qenë pas vitit 2019, për zgjedhjet parlamentare të 25 prillit.

Madje, ditën kur u hap fushata elektorale e Partisë Socialiste, Paja martohet me Ira Seferin dhe menjëherë pas celebrimit, është nisur menjëherë drejt fushatës dhe u shfaq krah Erion Veliajt.

Ai është këshilltar i PS në këshillin bashkiak të Tiranës dhe është shfaqur disa herë si bashkëpuntor në projektet e Bashkisë së Tiranës, në takimet e fushatës së Erion Veliajt apo në takimet private me Edi Ramën.

Paja u angazhua po ashtu edhe në zgjedhjet e prillit krah PS, e si duket besnikëria e tij ndaj PS është shpërblyer.