Policia Shqiptare ka shpërndarë me bujë një lajm që flet për arrestimin e dy të rejave maxhorene që ofronin shërbime erotike në qendra masazhi kundrejt pagesës.

Policia duket se ka vendosur të “vrasë mizat me vare” duke paraqitur si luftë kundër krimit goditjen e një aktiviteti që nuk është se shqetëson kërrkënd, përveç faktit që shërbimi mund të tatohej dhe shteti të përfitonte pjesën e tij.

Zakonisht këto qendra goditen në mënyrë selektive, shumica e tyre punojnë në të zezë por nën mbrojtjen e vetë policisë, që merr dorazi fitimet që në fakt duhej të paguheshin në formë tatimi.

Kështu, Policia e Shtetit ka njoftuar sot se pas një investigimi të publikuar në medie, ka vënë në pranga tre persona: administratoren 21-vjeçare të qendrës së masazhit si dhe një punonjëse 26-vjeçare, që u shfaqën në një investigim të emisionit “Stop”, po ashtu dhe një nga klientët e tyre, një djalë 25 vjeç. Uniformat blu thonë se kanë kryer disa muaj hetime për të vënë dy të rejat në pranga.

DETAJET E POLICISË

Finalizohet operacioni policor i koduar “Camouflage 22”, pas hetimeve disamujore.

Operacioni policor i zhvilluar nga Seksioni për Hetimin e Trafiqeve të Paligjshme.

Shfrytëzonte qendrën e masazheve për aktivitetin e kundërligjshëm të prostitucionit, vihet në pranga administratorja.

Gjithashtu arrestohen në flagrancë punonjësja e qendrës së masazheve, së bashku me një klient.

Specialistët e Seksionit për Hetimin e Trafiqeve të Paligjshme në DVP Tiranë, në vijim të punës për goditjen e paligjshmërisë, pas një pune të mirëfilltë hetimore disamujore, si dhe pas transmetimeve të pamjeve filmike në një nga emisionet investigative,  u finalizua operacioni policor i koduar “Camouflage 22”, në kuadër të të cilit u bë arrestimi në flagrancë i shtetasve:

– S. H., 21 vjeçe, për veprat penale “Shfrytëzimi i prostitucionit” dhe “Mbajtja e lokaleve për prostitucion”;

– E. Y., 26 vjeçe dhe L. V., 25 vjeç, për veprën penale “Prostitucioni”.

Shtetasja S. H. administronte një qendër masazhesh në rrugën “Luigj Gurakuqi”, në të cilën kishte punësuar shtetasen E. Y., dhe përveç aktivitetit të regjistruar ligjërisht si qendër masazhesh, ushtronin dhe aktivitetin e kundërligjshëm të prostitucionit.

Materialet i kaluan Prokurorisë pranë Gjykatës së Shkallës së Parë Tiranë, për veprime të mëtejshme procedurale.

Drejtoria Vendore e Policisë Tiranë falënderon mediat dhe qytetarët që denoncojnë rastet e paligjshmërisë dhe i fton sërish ata që të denoncojnë çdo rast paligjshmërie në Komisariatin Dixhital dhe 112, duke iu garantuar anonimat të plotë dhe reagim të menjëhershëm e të paanshëm.