Lulzim Basha dha dorëheqjen, kërkesën kjo e pjesës dërrmuese të demokratëve dhe besnikëve të tij. Basha u largua pas një seri humbjesh në krye të PD-së, por “vulën” e vendosi rezultati si forcë e tretë në zgjedhjet e pjesshme vendore të 6 marsit.

“Kam vendosur të hedh një hap pas duke u dorëhequr nga detyra e kryetarit të PD, me qëllim dhe i vendosur për të ndihmuar për ringritjen dhe bashkimin e demokratëve dhe Partisë Demokratike si shpresa e vetme për shqiptarët.

Kjo nuk është një tërheqje për rehati personale, por një nxitje më shumë që betejën tonë për një PD të së ardhmes ta bëjmë të gjithë bashkë të zhveshur nga çdo shpifje se kjo që ka ndodhur këto 6 muaj është bërë për karrigen e kryetarit”, tha Basha ndër të tjera në fjalën e tij.

Mënyra se si e dha dorëheqjen ngriti dyshime se Basha po luan një “lojë”, me anë të së cilës synon të rikthehet sërish në krye të PD-së.

I pyetur nëse do të rikandidojë sërish për të drejtuar PD-në, Basha u shmang, duke mos dhënë një përgjigje konkrete.

“Bashkë do të komunikojmë në ditët në vijim”, tha ai teksa doli nga selia blu.

Dorëheqja e Bashës ka ngritur shumë pikëpyetje. Edhe në media qarkullojnë lajme se ai nuk ishte i qartë në rolin që do ketë sa i përket zgjedhjeve në parti.

Dyshime për largimin e vertetë të Bashës ngriti fillimisht deputeti Ervin Salianji, një prej mbështetësve të tij që më pas i kërkoi dorëheqjen.

Ai tha se Basha e la evazive kur u pyet në mbledhjen me strukturat, nëse do të kandidojë sërish në zgjedhjet për partinë.

Edhe deputeti Luan Baçi ngre dyshime mbi dorëheqjen e dhënë dje nga Lulzim Basha.

“Pavarësisht se akti i tij i djeshëm është hipokrit, se Basha nuk ka dhënë dorëheqjen dje, ka thënë do largohem nga zyra. Ai duhet të largohet nga zyra dhe të krijojë hapësirat që PD të vijojë aktivitetin”, u shpreh deputeti.