Foto ilustrim: Edi Rama dhe Andi Bushati

Analisti Andi Bushati, ka folur për protestat e qytetarëve kundër rritjes së çmimeve. 

I ftuar në emisionin “Të Paekspozuarit” në MCN TV, Bushati tha se ndryshe nga çfarë pretendon kryeministri, protestat nuk kanë lidhje me Berishën dhe me Rusinë, por vijnë si pasojë e ankthit të qytetarëve, se në kohë krize kanë kuptuar “se kanë një qeveri që nuk kujdeset për ta”. 

“Parimi fillestar që kam unë, është shiko dikë që mundohet të gënjejë dhe pastaj përpiqu të kuptosh cfarë do të fshehë.
Berisha bëri protestë para dy muajsh, e patë sa mblodhi, ndaj nuk është Berisha pas protestës. Aq më pak Rusia, që i kemi dëgjuar këto përralla.

Përse këtu pati protesta më masive? Jo se njerëzit nuk e kuptojnë që kur ka krizë globale, edhe njerëzit do të paguajnë diçka. Njerëzit kanë kuptuar që kanë mbi kokë një qeveri që nuk kujdeset për ta në kohë krizash. Krizat i vuajnë shtresat më vulnerabël të shoqërisë.

Njeriu ka ankth, ka shqetësim, nuk di si do të çojë në shkollë fëmijët, etj. Nga vjen kjo? Njerëzit kanë kuptuar që të ardhurat e shtetit ndahen në mënyrë të pabarabartë. Edi Rama është babai i familjes që duhet të kullandrisë buxhetin. Nëse babai shkon i pi paratë me shokët, apo luan kumar, pjesëtarët e tjerë të familjes shqetësohen. Te pandemia e pamë, disa u pasuruan më shumë. Të gjithë institucionet ndërkomëbtare, thonë që paketat që ofroi qeveria shqiptarë ishin shumë të dobëta.

Njerëzit e dinë se një krizë po afrohet dhe i kërcënon, por kanë një qeveri që do të ndajë buxhetin, për Zoton, për tunelin e Llogarasë. Pra do t’i ndajë paratë me ata pesë njerëz që fitojnë në kurriz të tyre. Prandaj nuk është as protestë e Saliut dhe as e Rusisë, por protestë e ankthit.

E mbani mend Thumanë-Kasharë që u ndalua për studentët? Po bëhet Thumanë-Kashar, u harruan studentët. Kjo qeveri është e prirur të zhvasë nga më të varfërit dhe t’i ndajë me klientët e saj“, tha Bushati.