Lulzim Basha ka arritur më në fund, pas të gjithë përpjekjeve, të rendisë Partinë Demokratike forcë të tretë, në pesë nga gjashtë bashkitë ku u zhvilluan zgjedhje lokale. Vetëm në Rrogozhinë, ai arriti të sigurojë vendin e dytë, edhe aty me rezultat të ngushtë me kandidatin e Berishës. 

Por, përpara se të zhvilloheshin këto zgjdhje, një sondazh e nxirrte Bashën dhe PD-në, fitues të tre bashkive. 

Bëhet fjalë për sondazhin PIPOS, sipas të cilit Basha do të fitonte në Durrës, Shkodër dhe Dibër, por ai në fakt ka pësuar disfatë në të treja këto bashki. Madje Shkodrën, pritet ta fitojë kandidati i Berishës, që prin me një diferencë të konsiderueshme.

“Sipas të dhënave të sondazhit, Partia Demokratike triumfon në Bashkinë e Durrësit, Shkodrës dhe Dibrës. Partia Socialiste fiton në Bashkinë Lushnje, Rrogozhinë dhe Vorë me një rezultat shumë të ngushtë me Partinë Demokratike. Shtëpia e Lirisë, koalicioni midis LSI dhe Sali Berishës, nuk fiton në asnjë bashki“.