New York Post kishte një titull origjinal për këtë lloj mode: Mjaft e hodhe pallton supeve, dukesh si idiot/e. Faqe të tjera të Modës të medias amerikane e trajtojnë më butë këtë stil që ka filluar të quhet ‘diva drape’. E mbërritur nga Europa në Amerikën e Veriut palltoja apo xhaketa me mëngët e paveshura është një aplikim i pasarelave të modës.

Në kinematografi është sjellë kryesisht nga aktorë në rolin e burrave të fortë, si pronarë plantacionesh apo krerë të familjeve mafioze italo-amerikane të New York-ut.

Kalimi i kësaj prirjeje në ‘jetën civile’ lajmëron disa gjëra, sipas editorëve të modës. Veshësi/ja e palltos në këtë mënyrë don të lajmërojë se nuk ka nevojë t’i përdorë duart. Janë të tjerët që i bëjnë gjërat për të, që i hapin dyert e makinës, i mbajnë çantën, portofolin, ngasin makinën e tj. Pra, është një projektim i fuqisë.

Sipas Wall Street Journal këtë veprim e bëjnë editorët e modës dhe influencuesit e Instagramit. Ish-zonja e Parë Melania Trump e ka bërë këtë për foto të panumërta; Kim Kardashian e ka bërë në Paris; Meghan Markle e bëri gjatë rrugës për në një fejesë mbretërore në Londër. Herë pas here edhe Jimmy Fallon e bën kur ngjitet në skenë në “The Tonight Show”.

Edhe deputetja Grida Duma, shfaqet herë pas here në vende publike me pallton hedhur supeve, me një ‘shkujdesje dive’. Si për shembull në takimet elektorale për zgjedhjet e 6 marsit në Durrës, në favor të kandidatit të PD, Luan Hoti. Shpura shoqëruese është më e madhe se grupet që takon, kryesisht shihet në foto me shitës apo njerëz që takon rrugës, por kjo nuk e pengon që skenografinë ta ketë prej udhëheqësje të rëndësishme.  

Palltoja mbi supe, në një profesion si politika ku interakiviteti është kyç, ngjan skiç, por zonja Duma mund të jetë duke synuar pamjen prej dive që sugjeron Wall Street Journal dhe padashje bie në atë të një idioteje, që artikulon New York Post.