Mëngjesin e sotëm fadromat e IKMT-së kanë zbarkuar te “5 Maji” për të vazhduar shembjen e banesave në kuadër të projektit të rindërtimit. Ditën e sotme janë parashikuar për t’u shembur 12 shtëpi, ndërsa dhjetëra të tjera janë shembur më herët.

Në këtë zonë është parashikuar të shemben 430 banesa. Sikurse kishin paralajmëruar banorët kundërshtuan shembjen e shtëpive. Disa prej tyre hipën në çatitë e shtëpive në formë rezistence, por u larguan më parë nga forcat e policisë.

Protesta e banorëve u shoqërua me tensione dhe përplasje me efektivët. Për të vënë nën kontroll situatën ndërhynë forcat RENEA. Ata hodhën gure në drejtim të policisë, ndërsa kjo e fundit iu përgjigj me gaz lotësjellës.

Disa prej banorëve janë shoqëruar në polici, por nuk ka ende një numër të saktë të tyre. Ata kanë paralajmëruar se do të hyjnë në grevë urie.

Banorët e “5 Majit” janë bërë bashkë me ata të zonës së Laprakës dhe Paskuqanit dhe kanë dalë disa herë në protestë. Një përfaqësi e tyre u takua me kryeministrin Edi Rama, por takimi rezultoi i dështuar.

Banorët thanë se nuk morën asnjë garanci se do të marrin shtëpi nga shteti. Ata kanë kundërshtuar të firmosin marrëveshjen me Bashkinë e Tiranës. Nga ana tjetër qeveria thotë se ata do të strehohen, por banorët nuk i besojnë këto deklarata.