Ish-kryeministri Sali Berisha ka qenë sot në një takim me fermerët e Lushnjes, nga ku deklaroi se nisma “Ballkani i Hapur” është një projekt i rrezikshëm sidomos për fermerët.

Berisha garantoi se nëse demokratët vijnë në pushtet, do të rrëzojnë “Ballkanin e Hapur”, nismë kjo e Shqipërisë, Serbisë dhe Maqedonisë së Veriut.

“Nëse Shqipëria qëndron në projektin e integrimit në BE, ne do bëjmë hapat më të para në përgatitjen tuaj për këtë bashkim dhe kjo është e domosdoshme. Sikundër ne, ju garantoj se Ballkanin e Hapur do e hedhim poshtë, pasi është një nismë shumë e rrezikshme për fermerët tanë, pasi duhet të krahasoheni me fermerë që marrin subvencione të mëdha nga qeveria serbe”, tha ai.

Ish-kryeministri u shpreh se do të rrisin buxhetin e bujqësisë, zgjerojnë sipërfaqen e tokës për bujkun, si dhe do të caktojnë subvencione për secilin. Berisha theksoi se shteti duhet t’i paguajë fermerit çdo taksë që i është faturuar gjatë blerjeve.

“Do subvencionojmë blegtorinë dhe do vendosim subvencione për kokë. Një gjë ju garantoj, fermeri nuk do ketë asnjë taksë në shitjet e tij, shteti nuk do i marrë asnjë taksë për shitjet. Shteti do i paguajë atij të gjithë taksat që ka paguar në blerjet e tij. Ky nuk është një standard utopik, por është një standard i BE-së. Asnjë shqiptar nuk humbet nga ky standard, përkundrazi, fitohet më shumë. Fiton ekonomia”, tha Berisha.