Modelja 24-vjeçare Sofia Jirau u bë personi i parë me sindromën Down që merr pjesë në një fushatë të Victoria’s Secret.

Modelja portorikane u shfaq së bashku me 17 vajza të tjera për të promovuar koleksionin e ri “Love Cloud”.

Grupi përbëhet nga modele profesioniste dhe joprofesioniste.

Fytyra të famshme si Hailey Bieber, Taylor Hill dhe Adut Akech i bashkohen Celilo Miles, një zjarrfikëse që pozon me helmetën e saj dhe Sylvia Buckler, stiliste.

Valentina Sampaio, e cila u bë modelja e parë transgjinore e markës së të brendshmeve në vitin 2019, është gjithashtu në këtë fushatë.

24-vjeçarja përmes një statusi në “Instagram” shprehu emocionet e saj për pjesëmarrjen në fushatë.

“Një ditë e ëndërrova, punova për të dhe sot ajo ëndërr u bë realitet. Më në fund mund të ndaj sekretin tim të madh. Unë jam modelja e parë me sindromën Down për fushatën e Victoria’s Secret! Falënderoj të gjithë ata që më kanë mbështetur dhe kanë parë një modele te unë. Ky është vetëm fillimi!”.

Jirau është modele që nga viti 2019.

Në shkurt të vitit 2020, Jirau u bë një nga modelet e pakta me sindromën Down që mori pjesë në Javën e Modës në Nju Jork. Ajo përmes statuseve në rrjetet sociale jep mesazhin se njerëzit duhet të thyejnë barrierat e tyre dhe duhet të ndjekin ëndrrat.