Kryeministri Edi Rama ka replikuar me një komentues në rrjetet sociale, teksa e ka pyetur nëse ndjen përgjegjësi për aferën e inceneratorëve.

Rama i është përgjigjur duke thënë se në dijeninë e tij nuk e di të ketë afera të tilla, por pranon se ka pasur edhe individë që mbrapa shpinës së qeverisë, kanë abuzuar me pushtetin e tyre, për të nxjerrë përfitime të paligjshme.

Sipas Ramës, këto fakte do dalin në dritë nga hetimet e organeve të drejtësisë.

Qytetari: A ndjeni përgjegjësi ju Z. Kryeministër për aferën e inceneratorëve?

Rama: Për cilën “aferë të inceneratorëve” se unë nuk di ndonjë aferë inceneratorësh, po di një punë të mirë që ka shpëtuar tre komunitete të mëdha nga makthi i plehrave, në Tiranë, Elbasan dhe Fier!

Nëse në këtë punë të mirë ka pasur edhe individë që mbrapa shpinës së qeverisë, kanë abuzuar me pushtetin e tyre, për të nxjerrë përfitime të paligjshme, këtë e nxjerr hetimi dhe gjykimi i drejtësisë, jo propaganda politike apo balta mediatike! Por kjo nuk e ndryshon faktin se veprat janë ndërtuar, janë aty dhe janë në shërbim të komuniteteve, të shëndetit publik e të mjedisit.