Muzika e bën më të lehtë tranzicionin nëpër të cilin kalon një grua gjatë menopauzës.

Kjo konfirmohet nga një studim i kryer midis korrikut të 2019-ës dhe dhjetorit të 2020-ës në një kampion prej 48 grash. Rezultatet treguan se terapia muzikore mund të jetë e dobishme në veçanti në zbutjen e depresionit tipik gjatë menopauzës dhe pas saj.

Simptomat e menopauzës mund të jenë të shumëfishta dhe ndryshojnë nga gruaja në grua. Më të zakonshmet janë afshet, shqetësimet e gjumit, depresioni, thatësia vaginale, dëshira e ulët seksuale dhe dhimbjet e kyçeve dhe muskujve.

Muzika duket se ka fuqinë për të lehtësuar në mënyrë të konsiderueshme këto simptoma, pasi stimulon sekretimin e disa neurotransmetuesve, duke përfshirë dopaminën, serotoninën, oksitocinën dhe endorfinën, duke ulur hormonet e stresit si kortizoli dhe duke rregulluar ritmin e zemrës dhe frymëmarrjen. Nga ana tjetër, fuqitë terapeutike të muzikës janë të njohura që në kohëta të lashta në shumë kultura. Është përdorur për të trajtuar shumicën e sëmundjeve.

Një studim tjetër tregoi gjithashtu se terapia muzikore mund të jetë e dobishme për të luftuar simptomat depresive te pacientët me çrregullime mendore psikotike dhe jopsikotike. Është treguar gjithashtu se ndihmon në parandalimin e depresionit pas lindjes.

“Ka pasur një rënie të ndjeshme në rezultatet e BDI (shkalla e depresionit të Beck) tek gratë e testuara”, tha një nga autorët e hulumtimit.

“Dëgjimi i muzikës mund të ndihmojë në uljen e niveleve të depresionit dhe simptomave të menopauzës. Mund të përdoret si një opsion terapeutik jo-farmakologjik në kujdesin infermieror”, shton.

Ndërkohë që nevojiten më shumë kërkime për të konfirmuar rezultatet, ta provosh s`të bën keq. Në fund të fundit është falas.