Gazetari Elton Qyno: Basha nuk e ka treguar burimin kur u mor në pyetje nga prokurorët belgë

Një grup prokurorësh udhëtoi disa ditë më parë nga Belgjika drejt Tiranë për të bashkëpunuar me autoritetet shqiptare në lidhje me dosjen e “Toyota Yaris”, thuajse katër vite pasi u sekuestruan 3 milionë e 470 mijë euro në Portin e Durrësit.

Belgët pritën për dy orë e 20 minuta kryedemokratin Lulzim Basha, i cili tha se ishte pyetur si person në dijeni e se ishte në dispozicion të drejtësisë sa herë që të jetë e nevojshme. 

Gazetari i kronikës Elton Qyno i ftuar në ‘Politiko’ tha se në dijeninë e tij Basha nuk e ka deklaruar burimin nga e kishte marrë informacionin.

“Basha ka manovruar në dëshminë e tij, ai ka ditur diçka dhe e ka përdorur politikisht.

Në dijeninë time Ai nuk e ka treguar burimit, duke thënë se drejtoj një subjekt politik dhe cdo denoncim që vjen e publikoj dhe nuk mbaj përgjegjësi se deklaratat e mia janë në kuadër të politikës”, tha gazetari.

Çfarë është çështja “Toyota Yaris”?

Kjo çështje është bërë si fillim publike nga Lulzim Basha, i cili akuzoi kreun e Grupit parlamentar të Partisë Socialiste Taulant Balla si të përfshirë në marrjen e miliona eurove. Basha tha se në vendin tonë do të vinin 5 milionë euro, por në fakt në Portin e Durrësit u numëruan vetëm 3 milionë e 470 mijë euro. Deklarata e Bashës ndryshoi itinerarin pasi makinat që supozoheshin të niseshin nga porti Ankonës, devijuan rrugën dhe u nisën nga porti i Barit drejt Durrësit. Balla e fitoi edhe gjyqin ndaj Bashës, i cili u gjobit me 50 mijë lekë gjobë për shpifje. Fillimisht për këtë dosje u arrestuan gjashtë persona, por të gjithë u liruan përveç Elvis Vladit dhe shoferit të kamionit Agim Ceka.