Ish kryeministri Sali Berisha ka zhvilluar një takim me të rinjtë e FRPD-së në Lushnje. Ai ka qenë i shoqëruar nga Belind Këlliçi dhe djali i Sokol Olldashit, Glauk Olldashi.

Ky i fundit, i bëri thirrje të gjithëve që të votojnë kandidatin e “shtëpisë së Lirisë” për zgjedhjet e 6 marsit Elton Bano dhe tha se askush nuk mund ta ndalë zjarrin në zemrat e demokratëve.

“Kemi 9 vjet që lodhemi në këtë opozitë, 9 vjet që të paktën një herë jemi zhgënjyer të gjithë. Tani jemi kundër të gjithëve, kundër qeverisë, kundër oligarkëve, kundër kryetarit. Sot nuk është e vështirë te mendojmë që jemi në pikën tonë më të ulët. Po të gjithë këta bashkë nuk do munden kurrë  ta fikin zjarrin që është në zemrat e çdo demokrati.

Për Elton Banon besoj se nuk ka nevojë t’i bëjë lëvdata. Kam vetëm një mesazh që t’ia themi të gjithëve, dhe atyre që s’janë me ne, dhe atyre që janë socialistë. Elton Bano është kandidat i gjithë Lushnjes, është kandidat i të gjithëve”, tha ai.