Ish kryeministri Sali Berisha ka reaguar pasi kryetari i Partisë Demokratike, Lulzim Basha ka mbërritur në SPAK ku do flasë me prokurorët belgë për deklaratat për dosjen e 3.4 milionë eurove në ‘Toyota Yaris’,  ku u kapën 3.4 milionë euro.

 Sipas Berishës, i cili prezantoi kandidatin e koalicionit ‘Shtëpia e Lirisë’ në Vorë, Lulzim Vrana, Basha votoi më parë pro zgjatjes së mandatit të organeve të vettingut dhe më pas iku në Prokurori nga frika se mos u thoshte deputetëve të mos votojnë.

“Sot në Tiranë zbarkoi një skuadër e tërë prokurorësh dhe xhandarësh së Belgjikës, sepse Lulzim Brava, nëse ju kujtohet ju, në parlament, doli dhe tha do të “vijnë ditën e shtunë 5 mln euro me Toyota”, i njoftoi. Morën e bënë votimin përpara se të shkonte në prokurori nga frika se mos u thoshte deputetëve mos votoni. Ndaj cdo votë për kandidatin e Lulzim Bravës është votë për Edi Ramën.  Kjo është skllavëri”, tha Berisha.

Dosja ‘Toyota Yaris’

Katër vite më parë Lulzim Basha akuzoi Ballën si të lidhur me 3.4 milionë eurosh që ishin të fshehura në një makinë në Portin e Durrësit dhe vinin nga Belgjika, dy ditë para se policia t’i kapte ato më 24 qershorit 2018.

Prokuroria mori Bashën në pyetje se nga i kishte marrë informacionet, i cili duke u rrezikuar për t’u marrë i pandehur si dekonspirues i operacionit u paraqit më datë 25 korrik 2019 për të dhënë shpjegime përpara prokurorit.

Taulant Balla e paditi Lulzim Bashën për shpifje, lidhur me deklaratat që ky i fundit bëri në Kuvend se shuma e 3.4 milionë eurove e zbuluar ne dy makinat ‘Toyota Yaris’ i përkiste kreut te grupit socialist. Lulzim Basha u dënua nga gjykata me 50 mijë lekë gjobë për shpifje ndaj Taulant Ballës.

Mbrëmjen e 24 qershorit 2018, policia shqiptare sekuestroi rreth 3,4 milionë euro të fshehur në dy makina tip “Toyota Yaris” në portin e Durrësit. Makinat u gjetën në një karoatrec në tragetin që vinte nga Bari në Durrës.

Së bashku me dy makinat me para, në trailerin që i përkiste një kompania shqiptare transporti, kishte dhe 8 makina të tjera. Itenerari i makinave ka qenë Belgjikë-Gjermani-Itali-Shqipëri.