Pas përfundimit të dëshmisë në SPAK, kreu i opozitës Lulzim Basha, ka dhënë një deklaratë për mediet në ambientet e jashtme të SPAK.

Basha u shfaq i irrituar para kamerave duke ‘e shfryrë’ nervozizmin mbi gazetarët. Ishte pyetja e gazetares për të dhënë më shumë detaje nga dëshmia që acaroi kryedemokratin.

Ky i fundit iu drejtua duke i kërkuar ta lejonte t’i shkonte deri në fund deklaratës së tij, ose në të kundërt gazetarja së bashku me operatorin mund të largoheshin.

“Pasi të përfundoj deklaratën. Unë kam lirinë time dhe nuk ma merr dot askush. Sepse unë luftoj edhe për lirinë tuaj. Kur të mbaroj unë do të merrni pyetje për të gjitha. Nëse nuk iu pëlqen merrni kamerën tuaj dhe largohuni. Por unë deklaratën time do ta bëj deri në fund”, deklaroi Basha.  

Nga dëshmia e dhënë në SPAK, Basha nuk zbardhi detaje. Ai deklaroi vetëm se hetimet për çështjen “Toyota Yarsi” vazhdojnë, se do të vijojë bashkëpunimin me drejtësinë belg dhe se vetë ai u pyet në cilësinë e personit që kishte informacione.