Çmimi i naftës është rritur me ritme të shpejta, duke shkuar në 200 lekë/L. Kostoja e çmimit ka vendosur në pikëpyetje edhe linjat transportit urban dhe interurban, të cilët paralajmëruan rritje të çmim të biletave.

Administratori i Përgjithshëm i Konfindustria, Gjergj Buxhuku tha në një intervistë për RTV Ora, se 25% karburanteve në vendin tonë është kontrabandë, ndërsa shtoi se një pjesë e transaksioneve janë ileglale, pra nuk regjistrohen.

“Përtej faktit të thjesht të një rritjeje kemi të bëjmë me një fenomen që ekziston prej vitesh. Shqipëria prej vitesh është në vend të parë në nivel rajonal dhe europian për çmimet e karburanteve. Ajo që nuk përmendet shpesh është cilësia e dobët e karburanteve. Kjo përkthehet në kosto financiare, mjedisore, shëndetësore dhe kosto të teknologjisë  në makineritë qe preken nga cilësia e karburanteve. Mendohet se 25% e sasisë së karburantit është kontrabandë. Pikërisht këto çmime shumë të larta të vendosura me taksa shumë të larta shërbejnë që edhe pjesa që u grabitet qytetarëve shqiptarë dhe bizneseve përfundon në xhepat e atyre që e tregtojnë karburantin në mënyrë ilegale. Kemi transaksione të cilat janë legale, nuk janë të regjistruara. Sasia e madhe e taksave qe është vendosur në një litër karburant përfundon në xhepin e atyre që bëjnë kontrabandën”, tha Baxhuku.

Faktin që shteti nuk ndërhyn me politika rregulluese, për Buxhukun nënkupton se është bashkëpunëtor në këtë kapërcim çmimesh. Duke krahasuar situatën me Maqedoninë e Veriut, Buxhuku shprehet se aty nafta tregtohet me 140 lekë/ L, ndërsa në Bosnje me 1.3 euro/L.

“Shteti bën të pafuqishmin në këtë rast sikur nuk ka lidhje fare, ndërkohë që ka shumë mënyra për të kontrolluar çmimin dhe cilësinë. Fakti që shteti nuk ndërhyn në këtë rast kemi kapje të shtetit, që shteti është bashkëpunëtor në këtë rast kaq të rëndë. Për deri sa qytetari shqiptar janë pa mbrojtje atëherë pse mos te rriten çmimet? Kemi një situatë të ndërlikuar e cila e godet nga të gjitha krahët qytetarët, biznesin dhe qeverinë. Rritja e çmimit të karburanteve pasqyrohet  drejtpërdrejt te te gjitha çmimet e mallrave dhe shërbimeve. Maqedonia e Veriut e ka 1400 lekë sot karburantin  ne e kemi 2 mijë lekë, po flasim me të vjetra. Bosnja e ka 1.3 euro litrin”, vijoi Buxhuku.