Instituti i Studimeve Politike në një raport të fundit, i ka drejtuar Kuvendit disa rekomandime lidhur me hetimin e rasteve kur deputetët janë në konflikt interesi apo kur shkelet Kodi i Etikës.

Së fundmi ISP, ka konfirmuar një rast të padeklaruar nga ana e Kuvendit të një deputeti që është në konflikt interesi, por që nga ana e institucionit nuk është dhënë asnjë deklarim dhe nuk është ndërmarrë asnjë masë administrative.

Janë tre deputetë të Kuvendit në konflikt interesi që janë vetëdeklaruar: Arben Pëllumbi (PS), Dashnor Sula (PD) dhe Enslemvera Zake (PS), të tre për të njëjtin motiv: bashkëshorti/bashkëshortja ushtrojnë detyrën e noterit, pra lidhen direkt me përfitimet që vijnë nga ndryshimi ligjor.

ISP i ka bërë thirrje Kuvendit dhe grupeve parlamentare të partive të nxisin njësoj edhe të tjerë deputetët që janë në konflikte interesi, por që nuk janë deklaruar deri tani.

Reagimi i ISP:

Konflikti i interesit në Kuvend? Raporti i fundit i Institutit të Studimeve Politike (ISP) rekomandoi se Kuvendi duhet të dëshmojë vëmendje më të madhe ndaj standardeve të Kodit të Etikës, përfshirë hetimin e rasteve të mundshme të konfliktit të interesit, marrjen e masave administrative në rastin e shkeljeve të etikës dhe gjuhës denigruese, jetësimin e regjistrave të deklarimit dhe hetimin e thelluar të çdo rasti të raportimit publik mbi shkelje të mundshme nga Kuvendi apo deputetët në aktivitetin e tyre parlamentar.

Rekomandimi lidhej me faktin se deri më 31 dhjetor nuk kishte asnjë deklarim në konflikt interesi, ndërkohë që vetë ISP dhe Këshilli për Legjislacionin kanë konfirmuar një rast të tillë të padeklaruar dhe për të cilin Kuvendi nuk ka kryer hetime administrative, sipas ligjit.

Por ka një zhvillim pozitiv: Janë tre deputetë që kanë deklaruar gjendje në konflikt interesi në rastin e ligjit për noterinë, kaluar në Kuvend në janar 2022. Konkretisht janë deputetët Arben Pëllumbi (PS), Dashnor Sula (PD) dhe Enslemvera Zake (PS), të tre për të njëjtin motiv: bashkëshorti/bashkëshortja ushtrojnë detyrën e noterit, pra lidhen direkt me përfitimet që vijnë nga ndryshimi ligjor.

ISP vlerëson se ky është një rast pozitiv që duhet vlerësuar dhe tre deputetët kanë respektuar ligjin, por edhe etikën parlamentare. Kuvendi dhe vetë grupet parlamentare duhet të nxisin deputetët të ndjekin të njëjtat praktika në çdo rast të mundshëm të konfliktit të interesit.