Fitore epike dhe rekord! Tenisti spanjoll Rafael Nadal shkroi historinë në  “Australian Open”, duke mposhtur me përmbysje 3-2 rusin Daniil Medvedev, në një finale të çmendur që zgjati 5 orë e 24 minuta dhe fituar njëkohësisht trofeun e 21-të Grand Slam për meshkuj, një rekord absolut.

Përpara këtij trofeu, Rafael Nadal kishte qenë në një barazim trofesh (nga 20) me Roger Federer dhe Novak Gjokoviç, në krye të listës së të gjitha kohërave për fituesit kryesorë të meshkujve, por tani ai qëndron i vetëm falë titullit të tij të dytë në karrierë në këtë Grand Slam në “Australia Open”.

Spanjolli u bë gjithashtu personi  i katërt në histori që fiton të katër garat kryesore të tenisit të paktën dy herë. Ai për herë të fundit fitoi “Australian Open” në 2009.

Sfida nisi me një vrull të madh nga rusi i cili fitoi dy setet e para me shifrat: 2-6, 6-7. Atëherë kur të gjithë mendonin se Medvedev do të shpallej kampion dhe do të merrte kreun e renditjes në ATP, Nadal mendoi të kundërtën.

Një kthesë e çmendur erdhi nga Nadal, i cili arriti të fitonte tre setet e mbetura me shifrat: 6-4, 6-4, 7-5, falë përvojës dhe vendosmërisë.

Para fillimit të turneut, rusi Medvedev konsiderohej favorit për të fituar “Australian Open” për shkak të mungesës së serbit Novak Gjokoviç, i cili u deportua pas një sage 11-ditore me viza në prag të turneut, sepse ai nuk përmbushi kërkesat e Australisë për vaksinimin e COVID-19.

Edhe zvicerani Roger Federer nuk mori pjesë në turneun australian, për shkak të një dëmtimi në gju.