Ngritja e Agjencisë për Media dhe Informim ushoqërua me mjaft polemika, pasi organizatat e lirisë së shprehjes, gazetarë dhe punonjës të tjerë të medias, e krahasuan me një ‘ministri propagande’.

Në krye të agjencisë, kryeministri Rama ka vendosur zëdhënësin e tij, Endri Fugën. Emërimi është firmosur një ditë pas vendimit të qeverisë për krijimin e agjencisë. Ndërsa e kontaktuar nga BIRN, kryeministria e ka konfirmuar me një përgjigje zyrtare.

“Drejtori i Përgjithshëm i Agjencisë për Media dhe Informim, z. Endri Fuga, është emëruar me Urdhër të Kryeministrit nr.96, datë 29.9.2021 “Për emërim në detyrë”, thuhet në përgjigjen zyrtare.

Kujtojmë se bazuar në VKM, struktura synon centralizimin e marrëdhënieve të qeverisë me publikun. Agjencia parashikohet të kontrollojë emërimin dhe shkarkimin nga puna të zëdhënësve të institucioneve qendrore, detyrë kjo që bëhej nga ministritë përkatëse.

Në dorën e agjencisë do të jenë edhe konferencat për shtyp të të gjithë ministrave. “Drejtori i Përgjithshëm, statusi i të cilit barazohet me atë të ministrit të shtetit, është zëdhënës i Këshillit të Ministrave,” thuhet në vendim.

Organizatat ndërkombëtare për lirinë e shprehjes kanë shprehur shqetësim lidhur me këtë vendim të qeverisë shqiptare dhe i kanë kërkuar Bashkimit Evropian t’i bëjë presion qeverisë kundër krijimit të kësaj agjencie.

“Organizatat tona ndajnë shqetësimet e shprehura nga kryeredaktorë të ndryshëm, organizata të shoqërisë civile dhe sindikatat e medias në Shqipëri që thonë se krijimi i Agjencisë, në vend që të përmirësojë aksesin e gazetarëve te informacioni publik, mund të bëjë saktësisht të kundërtën,” thuhet në deklaratën e firmosur nga Artikulli 19, Qendra Evropiane për Liri të Shtypit dhe të Medias (ECPMF), Instituti Ndërkombëtar i Shtypit (IPU), OBC Transeuropa, Federata Evropiane e Gazetarëve dhe Free Press Unlimited.

Komisioni Evropian po ashtu ngriti shqetësimin e lirisë së medias në progres-raportin e fundit, kur  theksohej se Shqipëria nuk ka bërë hapa përpara për sa i përket lirisë së shprehjes.