Në mbështetje të banorëve të zonës së “5 Majit” dhe “Laprakës” kanë shkuar anëtarët e Komisionit të Rithemelimit. Deputetët Flamur Noka, Albana Vokshi, Klevis Ballliu dhe të tjerë i janë bashkuar protestës së tyre para parlamentit.

Më herët banorët dënuan heshtjen e kryedemokratit Lulzim Basha dhe deputetëve të tij ndaj protestës së tyre. Ata ngritën pretendime se deputetët e Bashës heshtin se kanë frikë nga “ndëshkimi” ose se kanë përfitimet e tyre nga këto projekte.

Deputeti Flamur Noka shprehu mbështetjen ndaj qytetarëve, ndërsa hodhi akuza se nga këto projekte përfitojnë Edi Rama dhe Lulzim Basha. Duke e akuzuar kryeministrin dhe kryedemokratin për pazare, Noka u shpreh se qytetarët po nxirren në rrugë për interesa korruptive.

Deri më tani pranë banorëve nuk ka shkuar asnjë deputet i Lulzim Bashës edhe pse këta të fundit kanë bërë thirrje për mbështetje.

“I dëgjuat qytetarët, dhimbja e tyre është shumë e madhe, sot këta, këta janë njerëz janë nxjerrë në rrugë, nga qeveria e pashpirt, e Edi Ramës dhe vemjes së tij Erion Veliaj. Këta njerëz nuk duhet të shkelen me këmbë, duhet të trajtohen si qenie njerëzore të denja të këtij vendi, të trajtohen gjysmën e trajtimit që iu bë afganëve të Sorosit. 

Ajo që është e rëndë, dhe që vetë banorët po ju bëjnë me dije ju, është fakti se në të gjitha këto projekte po del hapur në dritën e diellit, se ka një bashkëpunim mes Ramës, Veliajt dhe Lulzim bravës.

Ka pasur shumë pikëpyetje, me masakrën që po bëhet te ‘5 Maji’ apo në ‘Laprakë’ është gjithçka evidente, prapa kësaj historie është Lul brava me kapllanët apo alibeajt e tij, që përfitojnë nga këto projekte. Në do të jemi me çdo shqiptar që nuk pranon vjedhjen dhe dhunën, që nuk pranon pazarin Basha-Rama”, u shpreh Noka.