Në media qarkulloi një foto teksa deputeti i PD, Arbi Agalliu shfaqej në një bar kafe në qytetin e Vlorës së bashku me kryeministrin Edi Rama dhe disa persona të tjerë.

Për ABC, Agalliu konfirmoi se fotoja e qarkulluar këtë pasdite është e vërtetë dhe bëhet fjalë për një takim të dy muajve më parë.

Ai thotë se formimin e tij nuk e ka kompleks të përshëndes këdo dhe se me Ramën nuk ka bërë asnjë pazar.

“Nuk ka asgjë më shumë sesa duket në foton e nxjerrë si sensacion nga specialistët e manipulimit dhe të dhunës verbale e fizike. Është një përshëndetje 2 muaj më parë (13 nëntor), siç këmbehen 2 njerëz në të njëjtin mjedis dhe kaq!

Në kulturën dhe formimin tim nuk kam asnjë kompleks të përshëndes këdo. Në jetën time profesionale kam takuar dhe do takoj pafund njerëz me bindje të ndryshme politike, me pozicione të ndryshme e statuse të ndryshme. I besoj sjelljes qytetare dhe profesionale!

Me Edi Ramën nuk kam bërë kurrë asnjë pazar, asnjë marrëveshje, asnjë cënim të interesit publik!

Nga një anë më vjen keq që bëjnë qimen tra. Nga ana tjetër, më vjen mirë që kanë kaq shumë interes për aktivitetin tim politik dhe privat.

Të tilla lajme të sajuara keq i konsideroj si përpjekje shumë idiote për shantazh! Le të vazhdojnë! Unë kam zgjedhur të punoj për një të ardhme më të mirë për Partinë Demokratike dhe për vendin!”, deklaron deputeti Agalliu.