Fatmir Merkoçi ishte një nga të shoqëruarit nga policia pas protestës së mbështetësve të Sali Berishës para selisë së Partisë Demokratike.

Merkoçi i njohur edhe si aktivist i protestave të dhjetorit ’90, u filmua teksa ngjiste shkallët për në katin e dytë të selisë blu.

Lidhur me këtë fakt ai është pyetur nga hetuesit për arsyen që ka ndërmarrë këtë veprim. Merkoçi ka pasur një përgjigje “epike”.

Duke folur në “ABC live”, Merkoçi deklaroi se para hetuesve ka thënë se në shkallë ngjitet edhe kur digjet një llampë dhe nuk kishte si të mos ngjitej në to, kur sipas tij është “djegur” kryetari i PD.

“Unë ngjitem në shkallë kur duhet të ndërroj llampën e djegur…në seli u ngjita në shkallë se na është djegur kryetari” është shprehur Merkoçi.

Seanca e marrjes në pyetje në Komisariatin e Policisë sipas rrëfimit të tij: 

– Zoti Fatmir Merkoci, jeni thirrur për të deponuar se çfarë donit në majë të shkallëve tek selia e PD-së?

– Zoti hetues, keni parasysh kur digjen llampat dhe përdoren shkallët për t’i ndërruar meqenëse janë lart!

– Ç’lidhje ka kjo?

– Unë u ngjita me shkallë të ndërroj kryetarin qe rrinte në kat të dytë, se është djegur!