Nënkryetari i FRPD-së, Grigels Muçollari ka hedhur poshtë listën e delegatëve të Kuvendit të 18 dhjetorit, të cilën e publikoi disa ditë më parë Sekretari i Përgjithshëm i PD-së, Gazment Bardhi.

Nga selia blu, Muçollari deklaroi se delegatët e 18 Dhjetorit, që Bardhi deklaroi se janë 4.237 të tillë, në realitet janë 1.534. Muçollari theksoi se emrat e mbi 200 anëtarëve janë lexuar 3 apo 4 herë, ndërsa 1.687 rezultojnë të mos jenë as anëtarë të Partisë Demokratike.

Anëtari i komisionit shtoi se pas verifikimeve në Gjendjen Civile, një pjesë e emrave janë inekzistent, që mund të jenë shpifur ose që mund të jenë edhe njerëz që kanë ndërruar jetë.

“Ka mashtruar opinion publik dhe ata pak demokratë që mund ta mbështesin. Bardhi ka lexuar rreth 4.237 emra që pretendojnë se kanë qenë të pranishëm në datën 18 dhjetor. Dua të bëj të qartë, delegatët që Bardhi ka lexuar janë 1.534, ku ndër këta mbi gjysma s’kanë qenë të pranishëm aty. Mbi 200 anëtarë Bardhi i ka lexuar 3-4 herë për të rritur numrin në mënyrë artificiale. Rreth 831 emra i ka sajuar në mënyrë të qëllimshme, 1687 janë emra që nuk janë anëtarë të Kuvendit madje as anëtarë të PD-së. Ne verifikuam në Gjendje Civile dhe nga 100 emra, 66 janë emra të shpifur ose nuk ekzistojnë, ose persona që kanë vdekur”, deklaroi Muçollari nga selia blu.