Ish-Kryeministri Sali Berisha e lidhi publikimin e të dhënave sensitive të qytetarëve me takimin e zhvilluar 3 ditë më parë, të ndërmjetësuar nga Irfan Hysenbelliu, kanë darkuar bashkarisht Lulzim Basha, Erion Veliaj dhe Taulant Balla.

Berisha tha se ata u përpoqën ta paraqesin si ngushëllim, por në fakt ishte një darkë.

“Kanë pirë raki skrapari, madje e kanë tharë shishen”, u shpreh Berisha. Sipas tij, ata kanë shkuar fshehurazi, Irfani u përpoq ti maskonte, por prapë i dekonspiroi.

“Irfani u bë si Nar Koka, në darkën e ngjalave, dhe i bashkoi të tre bashkë. Darka i kushtoi bashkëpunimin mes Lulzim Bashës dhe Edi Ramës dhe hedhja në treg e të dhënave sensitive, ka lidhje me largimin e vëmendjes nga skandali i inceneratorëve, nga kjo darkë sekrete, nga skandale të tjera”, tha Berisha.

Sipas tij, këta përdorën metodën e plasjes së bombës në fjalë, për të shuar ato skandalet apo zhurmën e shkarkimit të Lulzim Bashës nga 44 mijë anëtarët e PD.

Berisha tha se e gjithë kjo ndodh pasi ata e dinë që në këtë vend nuk ka drejtësi, pasi SPAK është bërë SKAPI.

“Nëse në një vend tjetër do të kishte ndodhur ky skandal, Kryeministri do kishte ikur me ceremoni. Unë vetë do të jepja dorëheqjen”, tha Berisha.

Sipas tij, grupet kriminale nuk kanë më nevojë të paguajnë për shënjestrat e tyre, tani i kanë në tabela.