Kryeministri Edi Rama e ka konsideruar një infiltrim të brendshëm dhe jo sulm kibernetik skandalin e daljes së të dhënave të qytetarëve. Ai tha se ky rast ka ndodhur dhe në vende të tjera dhe mori shembuj shtete të zhvilluara. Kryeministri u shpreh për mediat se sistemi është i ekspozuar nga sulmet kibernetike.

“Këtu kemi bërë me një ndërhyrje që duhet hetuar deri në fund dhe ngjan më shumë si një ndërhyrje nga infiltrimi i brendshëm jo nga infiltrimi i jashtëm, në formën e një sulmi kibernetik, gjë që ndodh edhe kjo.

Nuk jemi as të parët as të fundit, nëse i refereoheni vetëm periudhës së fundit, ngjarje të tilla kanë ndodhur në shumë vende me kapacitete shumë të lara të mbrojtjes kibernetike, që nga SHBA, Rusi, Britani e Kanada dhe kjo është një sfidë e re e kohës. Ne jemi të ekspozuar ndaj sulmeve kibermitike dhe AKSH që funksionon me 3 shtylla, kërkimin shkencor, programimin dhe mirëmbajtjen e sistemeve”, tha Rama.

Më herët ai kërkoi të hetohet dhe të çohen para drejtësisë përgjegjësit, ndërsa i kërkoi prokurorisë që të marrë në pyetje punonjësit e institucioneve që kanë akses te këto të dhëna.