Kryeministri Edi Rama, i ftuar në Zonë e Lirë, është pyetur për aferën e inceneratorëve dhe arrestimin e ish ministrit të mjedisit, Lefter Koka. 

Kur Arjan Çani i tha se “ministri yt u arrestuar”, Rama tha se përgjegjësia e gjithësecilit është individuale dhe se duhet të përballen me drejtësinë. 

Rama shtoi se ai vetë nuk ka përgjegjësi dhe se nuk është marrë me procedurat. 

“Unë jam në marrëdhënie miqësore me të gjithë ata që punoj, por ua kam bërë të qartë atyre që punoj, që punët e skudarës janë punët e secilit prej jush. Nëse dikush shkel në dërrasë të kalbur i takon atij të merret.

Nëse ai ka shkelur apo nuk ka shkelur në dërrasë të kalbur i takon drejtësisë. Kushdo që ka bërë zullum, e ka bërë individual dhe do përgjigjet për çfarë ka bërë” – tha Rama për Lefter Kokën dhe madje e ka nxjerrë veten jashtë kësaj historie.

“Pse njëri bënte zullume pas shpine… unë nuk di gjë për vendimet që janë marrë. Unë nuk merrem me procedurën dhe di që nuk ka pasur kontestime. Di dhe që veprat janë aty. Inceneratorët janë sukses i qeverisë” – tha Rama.