Sali Berisha ka mbajtur fjalën e tij në Kuvendin Kombëtar të Partisë Demokratike, ku ndodhen mbi 4900 delegatë të kësaj force politike. 

Në Kuvend janë marrë vendime për ndryshime statutore, si vula dhe logo e partisë, shkarkimin e nënkryetarëve dhe hapjen e votimit të fshehtë për shkarkimin e Lulzim Bashës. 

Berisha në fjalën e tij, deklaroi se pjesëmarrësit janë mbledhur “për të rithemeluar Partinë Demokratike”. 

“Lulzim Basha në tetë vite, de facto u faktua vetë, si një kallp opozitar. Ai nisi drejtimin e partisë, duke u përkulur, në kundërshtim me ligjet, Kushtetutën, fuqinë e pakufijshme të forcës që drejtonte, duke u përkulur para regjimit të Edi Ramës“, tha Berisha. 

“Ne erdhëm në vitin 2021 të këtij shekulli, para një alternative shumë të rëndë. Partia që anëtarësoi Shqipërinë në Nato dhe u faktua lokomotivë e integrimit, që dha kontribute historike në pavarësinë e Kosovës dhe lirinë e shqiptarëve, partia që hodhi bazat e ekonomisë së tregut, e projekteve të mëdha energjitike dhe të gjitha fushave… Qeveria e kësaj partie futi Shqipërinë në rrugën e zhvillimit të shpejt…Kjo parti arriti në vitin 2021, si një forcë politike, e cila krijonte përshtypjen se ndodhej para alternativës ‘to be or not to be” (të jesh a të mos jesh).

Përse ndodhi kjo? Miqtë e mi, në vitin 2013, PD pas tetë vitesh në qeveri humbi zgjedhjet, njohu dhe realizoi rrotacionin e pushtetit. Kryetari i saj dha dorëheqjen, ashtu siç i takon çdo kryetari partie kur humbet zgjedhjet. Në krye të PD, erdhi përfaqësuesi i një gjenerate të re, i cili në vend të fuqizonte Partinë Demokratike, bëri të kundërtën e saj. Lulzim Basha në tetë vite, de facto u faktua vetë, si një kallp opozitar. Ai nisi drejtimin e partisë, duke u përkulur, në kundërshtim me ligjet, Kushtetutën, fuqinë e pakufijshme të forcës që drejtonte, duke u përkulur para regjimit të Edi Ramës“. tha Berisha ndër të tjera.