Në një intervistë për prestigjozen “The Indipendent” këngëtarja me origjinë shqiptare, Rita Ora, ka folur për planet e saj për të krijuar një familje të madhe, e për tu bërë nënë.

Këngëtarja 31-vjeçare  tha se i është nënshtruar 2 herë procesit të ngrirjes së vezëve, në moshën 24 dhe 27vjeç, pasi dëshironte të përqendrohej te karriera e saj në muzikë, por pa humbur mundësinë të bëhej nënë në një të ardhme.

Rita Ora: “Do të doja të kisha një familje të madhe të bukur. Në kulturën kosovare, të kesh fëmijë është e rëndësishme. Dhe unë mendoj se si gra që jemi, ne e bëjmë atë presion mbi veten tonë, në mënyrë të pandërgjegjshme, sepse mendojmë se kjo është detyra jonë, të krijojmë dhe të japim jetë. Pra, thjesht doja të mos shqetësohesha për këtë dhe ishte gjëja më e mirë që kam bërë ndonjëherë.”

Këngëtarja me famë botërore, aktualisht është në një lidhje dashurore me regjisorin e njohur, Taika Waititi, 46 vjeç. Edhe pse çifti e  mban lidhjen larg vëmendjes së medieve, Rita pranoi se nuk ishte aspak në kërkim të dashurisë kur takoi për herë të parë regjisorin 46-vjeçar në Australi, në fillim të këtij viti.