Ish kryeministri Sali Berisha ka deklaruar nga punimet e Kuvendit Kombëtar të PD se ‘non grata’ e tij nuk erdhi nga SHBA, por nga Georg Soros.

Ndërsa u ndal te vendimi i DASH, Berisha ka sulmuar edhe ambasadoren e SHBA në Tiranë, Yuri Kim, e cila sipas tij po sillet në vendin tonë si guvernatore dhe si dikur ambasadori sovjetik në Tiranë.      

Berisha: Të shumtë ishin ata që PD duhej të shkrihej se mbaroi misionin e saj, se është një forcë që nuk fiton dot, që certifikon vjedhjen e zgjedhjeve, vrasjen e shpresës së shqiptarëve.

Për këto, demokratët u bashkuan me nismën shpëtimtare të foltores dhe ata vendosën me diskutimet e tyre, debatet e lira, si njerëzit më të lirë të vendit të rithemelojnë PD që sot ne de jure e bëjmë realitet. Foltorja ishte uragani që kaloi nga qyteti në qytet, salla në sallë dhe që pushtoi mendjen e zemrat e shqiptarëve kudo që janë. Foltorja rithemeloi partinë e lirive tona, ekonomisë, e vlerave konservatore, interesit kombëtar.

Ndaj sot, përulem me nderim para mijëra qytetarëve që me guxim mbushën salla, delegatëve që me formën e tyre bënë të mundur mbledhjen sot të kuvendit të jashtëzakonshëm në historinë e vendit.

Kundër nesh peng kryetari me mbështetjen e qeverisë, por mjerisht u përballëm me një ndërhyrje të pashembullt brutale të diplomatëve dhe zyrtarëve nga një vend mik, SHBA.

U them këtyre zyrtarëve se jemi një komb i vjetër.  Perandoria e lirisë, vlerave, vend i madh i lirisë ka bërë për lirinë e shqiptarëve më shumë se cdo vend tjetër në botë. Është e dhimbshme të shohësh ambasadoren e SHBA, të sillet si guvernatore si dikur ambasadori sovjetik në Tiranë.

Presidenti i SHAB me dekretin e tij dekreton në këtë vend një ambasadore përfaqësuese të vlerave të kombit të tij të madh, të interesave të lirisë dhe sigurisë së këtij kombi. Po cfarë ndodh këto vite? E paimagjinueshme, në kulmin e mbulimit me drogë të Shqipërisë, me pjesëmarrje të policisë, policia përgëzohet. Nga ana tjetër sulmon opozitën dhe qëndrimet e saj.  

A nuk janë standarde të dyfishta? Këto nuk vijnë nga vendi i lirë, por nga mafia e Soros.