Pasardhësit e familjes së dinastisë së modës Gucci, janë shprehur të pakënaqur me përfaqësimin e tyre në filmin e ri House of Gucci. Në një deklaratë të lëshuar të hënën, trashëgimtarët e Aldo Gucci – i cili drejtoi shtëpinë e modës për 33 vjet deri në mesin e viteve 1980 – thanë se ishin të acaruar nga mungesa e konsultimit me krijuesit e filmave, si dhe nga portretizimi i tyre si “banditë, injorantë dhe të pandjeshëm ndaj botës që i rrethon”.

Filmi i Ridley Scott, ku luan Al Pacino si Aldo Gucci, Jeremy Irons si vëllai i tij Rodolfo dhe Adam Driver si nipi i tij Maurizio, i cili mori përsipër firmën derisa u vra në 1995 nga një vrasës me pagesë i punësuar nga ish-gruaja e tij, Patrizia Reggiani (luajtur nga Lady Gaga).

Deklarata vazhdoi: “Kjo është jashtëzakonisht e dhimbshme nga pikëpamja njerëzore dhe një fyerje për trashëgiminë mbi të cilën është ndërtuar marka sot.”

Deklarata përfundoi duke e cilësuar filmin si ofendim. “Gucci është një familje që jeton duke nderuar veprën e të parëve të saj, kujtimi i të cilëve nuk meriton të shqetësohet për të vënë në skenë një spektakël të pavërtetë dhe që nuk u bën drejtësi protagonistëve të saj.”

Megjithatë, pavarësisht se pohojnë se “anëtarët e familjes Gucci rezervojnë të drejtën për të ndërmarrë veprime për të mbrojtur emrin, imazhin dhe dinjitetin e tyre dhe të të dashurve të tyre”, nuk ka asnjë veprim ligjor.