Radar
Iu bë atentat me armë zjarri në Shkodër, ndërron jetë në spital ish-kreu i komunës Velipojë Pashko Ujka
Ndahet nga jeta ish kreu i komunës së Velipojës, Pashko Ujka. Disa orë më parë, 64-vjeçarit iu bë atentat me armë zjarri pranë shtëpisë së tij, në lagjen “Vasil Shanto”, në Shkodër.
Plumbat e kapën Ujkën në shtyllën kurrizore, por pavarësisht ndërhyrjes së mjekëve Ujka ka ndërruar jetë në spitalin rajonal të Shkodrës. Shkaqet e ngjarjes mbeten ende të paqarta.
Pashko Ujka ka qenë kryetar Komune në Velipojë për një mandat në vitet 2011-2015 nën siglën e PS.
Ujka ka qenë më parë edhe deputet i Partisë Demokristiane.
Hetimet janë përqendruar jo vetëm me funksionin e tij si ish-kryetar i Komunës së Velipojës, por edhe si ndërtues, nisur nga fakti se ai është ndërtues i disa pallateve në qytetin e Shkodrës vitet e fundit. Ndërkohë janë sekuestruar kamerat e sigurisë të bizneseve dhe banesave përreth që mund të ndihmojnë në zbardhjen e ngjarjes dhe kapjen e autorëve.
