Dyshohet se autobusit, ku humbën jetën 46 persona i ka plasur goma e përparme djathtas, e më pas është përplasur. Në atë moment është derdhur karburanti dhe mjeti është përfshirë zjarri.

Këto detaje i dha Vasko Pirgov, eksperti që ishte ndër të parët që mbërriti në vendngajrje, raportojnë mediat maqedonase. Ai ka shtuar se dyshohet për një gabim njerëzor, duke theksuar se shpejtësia ka qenë tej normave të lejuara.

“Zjarri është shkaktuar nga një gabim njerëzor i shoferit. Atje ka një vend që është për pushim. Autobusi me siguri ka udhëtuar me më shumë se 100 kilometra në orë. Nuk ka gjurmë të frenimit nga autobusi, kështu që shoferi nuk ka reaguar në mënyrë adekuate”, tha Vasko Pirgov, ekspert i motorëve me djegie të brendshme.

Ndërsa kryetari i Komunës së Përnikut, Stanislav Vladimirov është shprehur se në autostradën e “Struma-s” ndodhin shpesh aksidente rrugore, duke e përshkruar një rrugë me kthesa të shumta dhe të përpjeta.

Sipas tij, kjo rrugë bëhet edhe më e vështirë për drejtuesit e mjeteve për shkak të kushteve atmosferike, ndërsa në momentin e aksidentit autostrada ka qenë e lagësht për shkak të shiut.

“Rruga është e lagësht. Kjo pjesë ka një tatëpjetë shumë të madhe. Që nga dita e djeshme ka rënë shi. Nuk mund të thuhet nëse arsyeja është moti i keq, por arsyet mund të jenë të shumta”, deklaroi Vladimirov.

Aksi ku u rrëzua autobusi është hapur në vitin 2004, ku sipas ekspertëve bullgarë ende mungojnë sinjalistika dhe sistemet e kufizimit të shpejtësisë.