Jeffrey Hovenier do të jetë ambasadori i ri Shteteve të Bashkuara në Kosovë. Senati amerikan ka konfirmuar Hovenier në këtë detyrë, pasi presidenti Joe Biden e emëroi në muajin korrik.

Hovenier është një diplomat karriere në Departamentin e Shtetit, i cili së fundmi ka shërbyer si zëvendësambasador i Shteteve të Bashkuata në Turqi.

Më herët, ai ka shërbyer gjithashtu në misionet e Shteteve të Bashkuara, në Kroaci, Greqi, Panama, Paraguai dhe Peru, në Organizatën për Siguri dhe Bashkëpunim në Evropë (OSBE).

Hovenier ka përvojë në Kosovë, pasi ka shërbyer në ekipin e të Dërguarit të Posaçëm të OKB për statusin politik, Martti Ahtisaari.

Në vitin 2018, ish-Presidenti i Kosovës, Hashim Thaçi e nderoi Hovenier me Medaljen Presidenciale Jubilare për 10 vjetorin e pavarësisë së Kosovës, “për kontributin e tij për lirinë dhe pavarësinë e Kosovës”.

Gjatë ceremonisë për dhënien e medaljes, Presidenti Thaçi e falënderoi diplomatin amerikan “për kontributin në Konferencën e Rambujesë, në procesin e Vjenës dhe në procesin e shtetndërtimit të Kosovës”.

Disa ditë më parë Hovenier është shprehur se pa normalizim të raporteve Kosovë-Serbi, pa njohje të ndërsjellë, rajoni do të mbetet i bllokuar.