I ftuar në emisionin “Dola te Ola”, Ermal Mamaqi zbuloi disa detaje të reja nga seriali H.O.T, për te cilin po punon aktualisht. Ai ka zbuluar se seriali do të jetë gati më 15 tetor dhe ndryshe nga filmat e tjerë të tij nuk do të jepet në kinema, por do të transmetohet në një nga televizionet shqiptare.

Ermali zbuloi se seriali H.O.T i përket zhanrit dramë-komedi dhe do të trajtojë një histori dashurie të lidhur me intriga. Këtë produksion, Mamaqi e ka në bashkëpunim me producentin Dritan Huqi dhe regjisor është Bjordi Mezini. Edhe vetë Ermali do të interpretojë në serial, ku personazhi i tij do të quhet Daniel ose Dani.

Sa i takon emrit të serialit, H.O.T është shkurtimi i “Humans of Tirana”.

Kasti i aktorëve përfshin një numër të madh figuarsh të njohura dhe shumë të pëlqyera të ekranit, si: Jonida Vokshi, Klea Huta, Megi Pojani dhe Irgen Çela. Ndërsa gjatë intervistës, Ermali zbuloi edhe disa emra të tjerë, si: Ana Lika, Kastriot Çaushi, Monika Lubonja, Erblin Bajko, Amos Zaharia dhe Inis Gjoni, e cila do të luajë një rol negativ.

Madje, pak minuta më parë, ai ka postuar një foto me Inis Gjonin, për të cilën shkruan se “të kesh një regjisore në statusin e aktores është sfidë”.

Ermali nuk përjashtoi as mundësinë që në film të jetë i ftuar edhe ndonjë politikan, pavarësisht krahut politik që i përket. Xhirimet pritet të fillojnë së shpejti dhe nisur nga kasti, themi se do të jetë një sukses.