Virusi i stinës, i njohur ndryshe si gripi AH1N1, ka mbërritur tashmë në Shqipëri. Janë identifikuar dy rastet e para me virusin që po qarkullon në këtë periudhë, krahas Covid-19.

Shefja e Institutit të Shëndetit Publik Silva Bino, deklaroi se gripi i tipit A është konfirmuar deri tani në vetëm dy persona. Bino theksoi se në disa raste gripi ngatërrohet edhe me koronavirusin.

“Në Shqipëri është izoluar virusi i gripit në dy persona deri tani. Ne kryejmë testime dhe për grip dhe për Covid, të cilat i kryejmë kryesisht në popullata te caktuara, sidomos dhe në spitale që mund të jenë Covid negativ, por kane grip. Gripi i identifikuar deri tani është AH1N1”, deklaroi Bino.

Krahas koronavirusit dhe gripit të konfirmuar, qarkullon edhe virusi respirator “Sinsicial”. Sipas ekspertëve, ky lloj virusit është i ngjashëm për nga shenjat me Covid-19 dhe prek kryesisht moshat e vogla e të moshuarit.

“Po kemi identifikuar dhe virusin respirator “Sinsicial” dhe viroza të tjera. Është më i rrezikshëm tek fëmijët dhe tek të moshuarit. Klinika e tij është e ngjashme me Covidin dhe gripin, mund të shkaktojë forma të rënda dhe bllokim të mushkërive”, shtoi shefja e ISHP-së.

Teksa vendi po përballet me një fluks rastesh të reja me Covid-19, prania dhe qarkullimi i gripit rëndon më shumë situatën epidemiologjike në dimër. Bino i bëri thirrje qytetarëve të mos e shmangin përdorimin e maskave dhe të bëjnë vaksinën.

“Masa e kontrollit është mbajtja e maskës dhe eliminimi i i grumbullimeve të mëdha. Nëse nuk do t’i zbatojmë këto, është e kotë t’i vëmë fajin vaksinës. Nga ana tjetër popullata duhet t’i drejtohet vaksinës”, tha Bino.