Balina Bodinakun nuk e shohim në televizion që prej vitit 2010, kur prezantoi në krah të Ardit Gjebresë tek “E Diela Shqiptare”. Megjithëse është tërhequr momentalisht nga ekrani, ajo tha se nuk ka vendosur të largohet përfundimisht nga televizioni, ndaj nuk i dihet; mund ta shohim sërish.

Sidoqoftë, nuk ka mundur t’i shpëtojë vëmendjes së medias, veçse këtë herë për marrëdhënien e saj disavjeçare me analistin e njohur Andi Bushati. Balina Bodinaku foli për herë të parë për këtë marrëdhënie në IN Tv, e ftuar në “Tek Unë”. Ajo tregoi se ata janë njohur edhe më parë në rrethet mediatike, por ajo çfarë i bashkoi ishte një shaka nga ana e Andi Bushatit.

“Nuk ishte një shoqëri që u afrua me kalimin e viteve. Pastaj erdhi një rastësi që ende na çudit kur e kujtojmë, kur zbuluam se mund të rrinim bashkë, dhe që nga ajo ditë nuk u ndamë dot më.”-i rrëfeu ajo Arjola Shehut.

“Nisi si një shaka, një tallje. Ishte vera e 2008-ës. Më vjen një mesazh në telefon, ndërsa nxitoja për të hyrë në kinema, për të parë një film me shoqërinë. Shkruhej: ‘Ky është fustani që bleve sot?’. Nuk e njihja numrin dhe sigurisht nuk u përgjigja. Unë vërtet kisha hyrë në një dyqan, edhe pse nuk kisha blerë asgjë.”

“Të nesërmen, bie telefoni, ishte po ai numër. Sapo e hapa, më tha: “Ke apo s’ke gjak? Si nuk kthen një përgjigje mesazhit, apo të bëhesh kurioze se i kujt ishte numri…”

Balina e kishte kuptuar se bëhej fjalë për “Bushatin” siç e thërriste, dhe ndonëse ai i kish thënë se ishte thjesht një shaka, i kishte bërë përshtypje që ajo vërtet nuk i kishte kthyer asnjë përgjigje.

Pasi kishin nisur të bisedonin, Balina i ishte betuar se një ditë do t’ia kthente shakanë. Pasi kjo gjë u harrua, pas dy vitesh ajo vërtet ia ktheu. Pas një periudhe shkëputjeje nga televizioni Klan, Balina e kishte parë rastësisht Andin të ftuar në “Opinion”, dhe nuk e dinte që ai ishte kthyer në këtë emision. Kështu, mendoi t’ia kthente shakanë aty për aty.

“Marr telefonin e bankës, që nuk e kishte dhe i shkruaj:

“Klani nuk të shkon, por duket shumë më mirë me ty.”

Sepse doja që të kuriozohej aq sa u kuriozova unë. Nuk m’u përgjigj atë ditë”.

Dhe gjejeni pak? Pas disa ditësh i telefonon dhe ajo i thotë të njëjtën gjë që ai i kish thënë para dy vitesh: “Po ti more, ke gjak apo s’ke gjak?”.

Pas këtyre dy shakave, ata e patën më të thjeshtë të afroheshin me njëri-tjetrin.