Ish kryeministri Sali Berisha është më i pëlqyer se kreu aktual i PD, Lulzim Basha në bazë të perceptimi në rrjetet sociale.

Sipas ekspertit të komunikimit në rrjetet sociale Blerim Gjeladini në emisionin “Opinion”, teksa ka bërë një analizë të pëlqimeve në rrjetet sociale për Sali Berishën dhe Lulzim Bashën, rezulton se pëlqehet  63.7%, kurse Basha 36.7%.

“Në këtë rast kemi marrë vetëm Facebook, pasi të dy protagonistët përdorin këtë rrjet social. Kemi marrë rreth 37 mijë persona për studim, janë të dhëna kualitative. Për këta dimë moshën, gjininë, nga cili vend vijnë. Po ashtu kanë treguar nëse janë të martuar beqar, apo të divorcuar. Nga këto kemi mbi 36.2% për Lulzim Bashën dhe pjesa tjetër për Sali Berishën.

Por Berisha për herë të parë që nga studimet që kemi bërë ne ka kaluar dhe Edi Ramën. Ne studiojmë jo vetëm pëlqimet në postimet e tyre, por dhe në postimet që bëjnë mediat. Një fakt interesant është se Basha ka një mbështetje tek mosha e madhe, ndërsa Berisha ka të rinjtë. Berisha ka kryesisht beqarët dhe të rinjtë, ndërsa Basha ka gratë, në Korçë dhe Gjirokastër. Në Tiranë është 64 për Berishën dhe 35% për Bashën. Qarku që bën diferencën është Kukësi, ku Berisha ka një mbështetje shumë të madhe, ndërsa në Gjirokastër ka më pak mbështetës”, tha Gjeladini.

AI shtoi se për Bashën është kapur një ‘anomali’, pasi “i është rritur llogaria me 54 mijë ndjekës brenda një dite, që supozohet që janë blerë jashtë”.