Opozita turke ka hedhur akuza për jetën luksoze të familjes së presidentit turk, Rexhep Taip Erdogan. Pavarësisht se ekonomia e vendit është goditur rëndë nga pandemia, deputeti nga “Partia e Mirë”, Ahmet Erozan ka shkruar së gruaja e presidentit, Emine Erdogan mban në dorë një orë me vlerë mbi 30 mijë euro. Erozan ka ironizuar përmes një postimi në “Twitter”. Ai ka publikuar një foto të librit të Emine Erdogan që quhet “Udhëtimet e mia Afrikane” dhe foton e saj me orën në dorë. Deputeti opozitar shkruan se në harmoni me varfërinë e Afrikës, vlera e orës së Emine Erdogan, nëse ajo është origjinale, shkon në mbi 30 mijë euro.

Libri ”Udhëtimet e mia Afrikane” është një përmbledhje e përshtypjeve dhe kujtimeve nga udhëtimet e saj në Afrikë, pas vizitave zyrtare të Tajip Erdogan. Libri do të dalë në libraritë në Turqi në fillim të tetorit dhe sipas Anadolu, zonja e parë e vendit do t’ia prezantojë atë grave të presidentëve dhe kryeministrave gjatë qëndrimit të çiftit në Nju Jork për samitin vjetor të OKB -së.