Gazetari Nikoll Lesi ndërsa komenton situatën politike në vend, paralajmëron se kryeministri Edi Rama dhe kreu i PD-së, Lulzim Basha po shkojnë drejt bashkëqeverisjes.

Në një shkrim të publikuar në gazetën e Nikoll Lesit, thuhet se në fund të tetorit, do kemi një qeveri Rama-Basha, e cila sipas tij ka edhe “bekimin” e ndërkombëtarëve.

“Edi Rama mori dekret për kryeministër. Do dekretohen edhe ministrat e propozuar nëqoftëse nuk kthen ndonjërin Presidenti Meta.

Ndërkohë dueli Basha-Berisha do të vazhdojë në bazë, por duket se Berisha edhe nëse mbledh firmat me Referendum partiak për të shkarkuar Lulzim Bashën, nuk do t’ia njohë gjykata. Mazhoranca me ndikimet e saj do ti jap të drejtë Lulzim Bashës.

Pra Lulzim Basha mbetet kryetar i PD.
Berisha mund të marrë diku te 10 deputetë nga grupi parlamentar demokrat dhe do të vazhdojë të denoncojë Qeverinë e re Rama-Basha të fundtetorit të këtij viti.
Ndërkommbëtarët dhe sidomos SHBA janë të interesuar për një bashkëqeverisje PS-PD. Preteksti mbetet se vendi nuk ka stabilitet dhe për t’u integruar në BE.”-shkruan gazeta e Nikoll Lesit.

Ndërsa në opozitë, sipas tij do të mbeten vetëm deputetët që do shkojnë me Berishën si dhe deputetë e LSI.

“Ndërkohë Opozitë e vertetë do mbetet LSI dhe Berisha me deputetët e tij.
Por janë pak, sepse nga 140 deputetë, Opozita do mbetet vetëm me 4 deputetët e LSI dhe 10 deputetët pro Berisha.

Natyrisht edhe një deputet mjafton për të nxjerrë të palarat e qeverisë. Por prapë Demokracia do rrudhet edhe me tepër.
Kjo është skema që po gatuhet fshehurazi.”-thuhet më tej në shkrim.