Ish kryeministri Sali Berisha, ka qenë i ftuar në emisionin e Erla Mëhillit në Euronews Albania, ku ka folur për seancën e parë të legjislaturës së re parlamentare.

Edhe pse është shpallur non-grata nga SHBA-të, Berisha tha se do të jetë në Kuvend, nga ku do të mbrojë “sovranitetin e Shqipërisë” dhe dinjitetin e tij. Berisha tha se kjo nuk do të ketë kosto për PD-në, sepse PD nuk mund të ketë kosto kur mbron parimet demokratike.

“Ditën e premte Sali Berisha do të jetë në parlament, në përputhje të plotë me vullnetin e qytetarëve shqiptarë. Nuk fshihem prapa mandatit, absolutisht jo. Nuk fshihem prapa sovranitetit, nuk fshihem prapa dinjitetit. Unë bëj gjithçka për të mbrojtur dinjitetin tim, sovranitetin e vendit tim, sepse sovraniteti i vendit tim është shprehur nga zgjedhësit me votë. Asgjë nuk mund të më detyrojë mua, që të shkelmoj mbi dinjitetin tim, që është thelbi i lirisë së njeriut. Mandati është i parlamentit jo i deputetit. Nuk bëj asgjë përveçse, i nënshtrohem sovranitetit, mbroj sovranitetin. Nuk mund të ketë tërheqje”, tha Berisha.

Ish kryeministri, rrëfeu edhe një takim me ambasadorët, në zgjedhjet lokale të vitit 2011, kur i kërkuan të ndalojë numërimi i votave në kutitë e gabuara. Berisha tha se mbrojti “sovranitetin e vendit”.

“Në momentin kur po numëroheshin votat për Ramën dhe Bashës, në zyrë më erdhën një grup ambasadorësh, sepse Rama kishte dërguar të gjithë bashkinë dhe rrethuar KQZ. Unë i prita mirë. Më thonë, a mund ta ndërpresësh atë numërim. I thashë e ndërpres, kur të hedh në det sovranitetin e Shqipërisë.

Më thanë mund të ketë incident. Ua dhashë një sugjerim, transmetoja zotit Rama këtë mesazh. E transmetuan dhe turma u largua. Votat u numëruan me pesë kamera. Këtu nuk është cështje e individit, absolutisht jo.

PD nuk futet kurrë në konflikt me asnjë shtet të lirë demokratik, nëse mbron parimet e demokracisë. Pro amerikanizmi i PD. Pro europianizmi i PD, gjatë të gjithë ekzistencës 23 vjecare që kam drejtuar, është bazuar në respektimin e parimeve të shoqërisë së lirë amerikane, shoqërive të lira europiae. Sot, Shqipëria është katandisur në delen e zezë të Ballkanit dhe Europës”, tha ndër të tjera Berisha.