Fidel Ylli: Kosova, buxhet 10 herë më të madh se Shqipëria për sportin

Presidenti i Komitetit Olimpik Kombëtar Shqiptar, Fidel Ylli, është shprehur se institucionet në Shqipëri, duhet duhet t’i kushtojnë më shumë vëmendje sportit. Në lidhje direkte nga Tokio, për edicionin e lajmeve në MCN TV, Ylli ka thënë se të gjithë janë munduar që Shqipërinë ta përfaqësojnë me dinjitet në Lojërat Olimpike.

“Institucionet vendore duhet të jenë më të vëmendshme ndaj sportit. Jemi munduar që Shqipërinë ta përfaqësojmë me dinjitet. Calja e humbi për vetëm 1 kg medaljen. Kemi Luiza Gegën, ku Shqipëria për herë të parë ka një atlete në finale.”

Duket folur për sportistët e Kosovës, që arritën të fitojnë dy medalje ari, ai tha se qeveria kosovare ka dhënë një buxhet 10 herë më të madh se Shqipëria për sportin.  

“Sportistët e Kosovës? Mendoj që qeveria e Kosovës, sportin e ka parë si një aset të çmuar për imazhin e vet. Kanë një buxhet 10 herë më të madh se Shqipëria. Kanë një vëmendje që në Olimpiadë vjen presidentja e Kosovës. Nesër do të priten në shesh. Një sportist nuk përfaqëson vetëm veten, por edhe vendin e tij.”

Ylli tha se u bë e mundur që kryetari i Bashkisë së Tiranës, Erion Veliaj, ta shikojë nga afër se në çfarë kushte punojnë sportistët e tjerë dhe për këtë të investohet në infrastrukturë në vendin tonë.

“Është bërë e mundur që kryetari i Bashkisë së Tiranës, ta prekë vetë se çfarë ka bota dhe në cfarë kushte punojnë sportistët. Që Luiza Gega të mos shkojë në Kenia të përgatitet. Petrov të mos shkojë në Çeki, pasi nuk ka një kalë dorezash në vendin tonë. Në vendin tonë sportin e kanë parë si një ‘thelë mbi bisht’. Pas Olimpiadës, do ulemi me ministren e sportit, që në Olimpiadën e ardhshme, Shqipëria të përfaqësojë me dinjitet në këto gara dhe pse jo të kemi medalje. Kishim një atmosferë të mirë dhe të gjithë sportistët kanë falënderuar KOKSH. Kur ata shikojnë që kryetari i bashkisë është edhe në stërvitjet e tyre, kanë edhe më shumë shtysë për të ecur para.”, përfundoi presidenti i KOKSH, Fidel Ylli.